Angola


Angola is een Land in Süüdwest-Afrika mit en Flach vun 1.246.700 km². Dor leeven 25.789.024 Minschen (2014). De Hööftstadt is Luanda. Angola grenzt an Namibia, Sambia, de Demokraatsche Republik Kongo un an den Atlantschen Ozeaan. De Exklave Cabinda (Vörmols „Portugees'sch Kongo“) liggt ganz in'n Noorden twuschen de Demokraatsche Republik Kongo un de Republik Kongo an'n Atlantik.

De Naam Angola kümmt vun dat Woort Ngola her. Dat weer de Titel vun de Königen vun Ndongo, en Königriek unner Infloot vun dat Kongoriek. Düssen Naam hefft de eersten portugees'schen Seefohrers dat Land geven, as de an de Küst anlannt weern. To'n Teken, dat vun nu af an de Kroon vun Portugal hier dat Seggen harr, hefft se dormols steenern Krüüzen dor upstellt.

De meisten Inwahners höört to dree Bantu-Volksgruppen to. Jede Grupp hett ehre egen Sprake. 30% vun de Inwahners sünd Ovimbundu. 21% höört to de Kimbundu un 12% to de Ganguela. Denn gifft dat ok noch 7% Nhaneca-Humbe, 5% Xindunga, 3% Bakongo, Ovambo, Herero un Tshokwe. Bi 30.000 Portugesen leevt hüdigendags ok noch in dat Land.

Amtssprake is Portugees'sch. Man alltohopen weert 41 Spraken snackt, dormank as gröttste Spraken Umbundu (37%, snackt vun dat Volk vun de Ovimbundu), Kimbundu (25%) un Kikongo (13%).

Toeerst hefft Buschlüde in Angola leevt, man de sünd denn later vun Bantu-Völkers verdreven wurrn. 1483 hefft de Portugesen anfungen un hefft jem ehre eersten Hannelsposten an de Küsten inricht'. Lütt bi lütt is Angola denn en portugees'sche Kolonie wurrn. An'n 11. November 1975 is dat Land vun Portugal unafhängig wurrn. Dorüm is de 11. November nutodaags in Angola Natschonalfierdag. Na de Unafhängigkeit hett dat en langen Börgerkrieg twuschen de MPLA un de UNITA geven, de eerst 2002 to Enne kamen is. Vun dor af an warrt dat Land wedder upboot.

Angola siene Hööftstadt Luanda

De fiev gröttsten Städer sünd:

  • Luanda (2.819.000 Inwahners)
  • Huambo (203.000 Inwahners)
  • Benguela (155.000 Inwahners)
  • Lobito (150.000 Inwahners)
  • Lubango (105.000 Inwahners)


Other Languages

Copyright