Dörte Liebetruth

Dörte Liebetruth, 2018

Dörte Liebetruth (* 23. November 1979 in Bremen) is en düütsche Politikerin von de SPD. Se is siet 2017 Afornte in’n Landdag von Neddersassen.

Liebetruth is 1979 as Dochter von Jutta un Wilfried Liebetruth in Bremen boren un in Kerklinneln opwussen. Se hett von 1986 bet 1990 de Grundschool Bennbössel besöcht, weer von 1990 bet 1992 för de Orientierungsstufe an dat Schoolzentrum Kerklinneln un is von 1992 bet 1999 na dat Gymnasium an’n Wall in Veern gahn. Blots in dat Schooljohr 1996/1997 weer se för een Johr op Uttuusch in de USA un hett de Lincolnton High School in Lincolnton besöcht. In ehre Schooltied weer se 1998 bet 1999 Sprekerin von’n LandsschölerInnenraad Neddersassen un Viezpräsidentin von de BundsschölerInnenvertredung.

Na dat Abitur hett se von 1999 bet 2004 an de Hoochschool för Musik, Theater un Medien Hannover Medienmanagement mit Nevenfach Juristeree studeert un dat Studium as Diplom-Medienwetenschopperin afslaten. Von 2005 bet 2011 hett se an de HMTM Hannover ehr Dokterarbeid to dat Thema Europa vor Ort verankern schreven un dormit den Dr. phil. kregen.

Von 2005 bet 2009 weer se blangenbi ok wetenschopliche Mitarbeiderin för de Afornten Lars Klingbeil un Joachim Stünker in’n Bundsdag un von 2011 bet Februar 2013 wetenschopliche Mitarbeiderin von’n Europaafornten Bernd Lange.

Von Februar 2013 bet Mai 2015 hett se in dat Neddersassische Ministerium för Soziale Saken, Gesundheit un Gliekstellung as Persönliche Referentin von Ministerin Cornelia Rundt arbeidt un weer denn von Mai 2015 bet Dezember 2016 Referentin för Arbeid, Soziale Saken un Gesundheit an de Vertredung von dat Land Neddersassen bi’n Bund. Siet Januar 2017 weer se Baas von de Geschäftsstell to’n Aktschoonsplaan Inklusion för en barriernfree Neddersassen un Referentin in dat Referat „Inklusion von Minschen mit Behinnerungen“ bi dat Neddersassische Ministerium för Soziale Saken, Gesundheit un Gliekstellung.

Se leevt vondaag wedder in Kerklinneln.

Von 2001 bet 2005 weer Liebetruth Landsvörsitterin von de Jusos un von 2003 bet 2008 hett se de düütschen Jugendverbänn op europääsche Ebene vertreden.

In de SPD is se siet 2000 Maat von’n SPD-Bezirksvörstand Noord-Neddersassen un siet 2002 Maat von’n SPD-Kreisvörstand Veern.

Bi de Wahl 2016 is se in’n Kreisdag von’n Landkreis Veern intagen. Dor is se Vörsitterin von’n Utschuss för Soziale Saken un Gesundheit un Viez-Vörsitterin von de SPD-Frakschoon.

För de Landdagswahl in Neddersassen an’n 15. Oktober 2017 weer se de Direktkannedaat in’n Landdagswahlkreis Veern un kunn sik mit 39,77 % von de Eerststimmen dörsetten.

Other Languages

Copyright